05 aprel 2018-ci il tarixində Hyatt Regency Bakı mehmanxanasının Quba zalında “Qadın hüquqlarının müdafiəsi: beynəlxalq və milli aspektlər” adlı kitabının təqdimat mərasimi keçirilib.
“Qadın hüquqlarının müdafiəsi: beynəlxalq və milli aspektlər” adlı kitab ABŞ Beynəlxalq İnkişaf Agentliyinin (USAİD) maliyyələşdirdiyi və Kaunterpart İnterneşnl təşkilatının icra etdiyi Qadın İştirakçılığı Proqramı çərçivəsində “Konstitusiya” Araşdırmalar Fondu tərəfindən nəşr olunub. Kitabın nəşrinə Azərbaycan Respublikasının Ailə, Qadın və Uşaq Problemləri üzrə Dövlət Komitəsi dəstək verib.
Kitab Bakı Dövlət Universiteti Hüquq fakültəsi Elmi Şurasının 26 sentyabr 2017-ci il tarixli 01 saylı iclasının və İnsan hüquqları və informasiya hüququ üzrə YUNESKO kafedrasının 25 sentyabr 2017-ci il tarixli 01 saylı iclasının qərarları ilə dərs vəsaiti kimi tövsiyə edilmişdir.
Tədbirdə Professor, siyasi elmlər doktoru, AR Ailə, Qadın və Uşaq Problemləri üzrə Dövlət Komitəsinin sədri, Hicran Hüseynova, ABŞ Beynəlxalq İnkişaf Agentliyinin (USAID) Azərbaycan üzrə missiyasının direktoru , Mikaela Meredis, “Konstitusiya” Araşdırmalar Fondunun prezidenti Əliməmməd Nuriyev giriş nitqi ilə çıxış ediblər.
Bundan sonra müəlliflər, Hüquq üzrə elmlər doktoru, professor, Bakı Dövlət Universitetinin Hüquq fakültəsinin dekanı Əmir Əliyev, Bakı Dövlət Universitetinin Konstitusiya Hüququ kafedrasının Baş müəllimi Qulamhüseyn Əlibəyli, Hüquq elmləri üzrə fəlsəfə dokturu Bakı Dövlət Universitetinin Hüquq fakültəsinin “İnsan hüquqları və informasiya hüququ” üzrə YUNESKO kafedrasının müəllimi Pərvanə Bayramova, AR İnsan Hüquqları üzrə Müvəkkilinin (Ombudsman) Aparatının rəhbəri Aydın Səfixanlı, hüquq elmləri üzrə fəlsəfə doktoru, Ailə, Qadın və Uşaq Problemləri üzrə Dövlət Komitəsinin İnformasiya və analitik araşdırmalar şöbəsinin müdiri Elgün Səfərov çıxış edərək kitab barədə məlumat veriblər.
Çıxışlardan sonra tədbir çərçivəsində müvafiq mövzular ətrafında alimlər və ekspertlərin iştirakı ilə müzakirələr keçirilib.
